«Норуот билиниитин ылбыт 10 учуутал» кинигэ сүрэхтэниитэ

 Муус устар 28 күнүгэр С.Н.Донской-II аатынан Үөрэҕи сайыннарар уонна идэни үрдэтэр институт аактабай саалатыгар дьоро дьоһун  түгэн буолан ааста. Ол курдук истиҥ санаа иэйиитин, үтүө санаа үтүмэнин инэриммит  ураты дьон сыралаах үлэлэрин  бар дьоҥҥо биллэрээри, учуутал  айымньылаах үлэтигэр сүгүрүйээччилэр, махтанааччылар ирэ – хоро кэпсэтээри, санааларын этээри  муһуннулар.

Учуутал үлэтэ олус түбүктээх, эппиэтинэстээх эрээри, сүрдээх интэриэһинэй. Кини оҕолору кытта алтыһар буолан мэлдьи эдэр.  Учуутал билиини эрэ биэрэр буолбакка, иитиигэ-сайыннарыыга улахан кылааты киллэрэр, оҕо кэлэр кэскилин сирдиир үтүөкэн аналлаах, үөрэнээччи олоххо бэлэмнээх киһи буола улаатарыгар далаһа уурааччы буолар.

    Кинигэҕэ сүрүннээн төрөппүттэр уонна  үөрэнээччилэр чопчу бу учуутал туһунан ордук тугу чорботон бэлиэтии, сөбүлүү саныылларын, үөрэххэ-иитиигэ ханнык түгэннэри ахта-саныы, өйдөөн хаалбыттарын ырытыыта, сыанабылы биэриилэрэ сырдатыллыбыт.  Бу кинигэ күн сирин көрөрүгэр күүстэрин кыахтарын уурбут, сыраларын биэрбит кыһамньылаах үтүөкэн дьону,  убаастабыллаах  Екатерина Егоровна Потапованы, Зинаида Ивановна Игнатьеваны саалага мустубут дьон дохсун ытыс тыаһынан көрүстүлэр. Кинилэр хас эмэ сыл устатыгар матырыйаалы түмэн, сааһылаан, тус бэйэлэрин күүстэринэн-кыахтарынан  оҥорон таһаарбыттара хайҕаллаах суол.

    Эҕэрдэ тылы Ил Түмэн наукаҕа, үөрэххэ, культураҕа, общественноһы кытта сибээскэ комитет бэрэссэдээтэлэ Антонина  Афанасьевна Григорьева,  Үөрэх уонна наука министиэристибэтин кадрга отделын начаалынньыга Анна Родионовна Гуляева, үөрэҕи сайыннарар уонна идэни үрдэтэр институт дириэктэрэ, п.н.д. Галина Ивановна Алексеева, “Норуот педагогиката” Ассоциация бэрэссэдээтэлэ  Иван Иванович Кондаков эттилэр.

        Истиҥ- иһирэх көрсүһүү сүрүн төрүөтэ, ис хоһооно буолбут күндү убаастыыр-ытыктыыр, сөҕөр-махтайар, киэҥ туттар дьоммут, «Норуот билиниитин ылбыт 10 учуутал» ааттара:

       1. Любовь Егоровна Евсеева,  Сунтаар улууһун гуманитарнай хайысхалаах гимназия дириэктэрэ,  идэтинэн  омук тылын учуутала.

2. Эмма Хрисанфовна Кашкина, Таатта улууһун Чөркөөх орто оскуолатын учуутала.

3. Виктор Петрович Потапов, Республиканскай лицей-интернат физикаҕа учуутала.

  1. Капитолина Афанасьевна Ефимова, Ньурба политехническай лицейин дириэктэрэ,  идэтинэн математика учуутала.
  2. Мария Федотовна Михайлова, Бүлүү 3-нүөмэрдээх орто оскуолатын алын кылааһын учуутала.

      6. Лидия Петровна Шамаева, Дьокуускай куорат  “Айыы  кыһата”  оскуола дириэктэрэ,

       идэтинэн алын кылаас учуутала.

      7. Любовь Святославовна Заровняева,  Дьокуускай куорат 17-с оскуолатын  алын

      кылааһын учуутала.

8. Наталия Николаевна Индеева,  Дьокуускай куораттааҕы лицей нуучча тылын уонна литературатын учуутала.

9. Галина  Афанасьевна Кривошапкина, Нам улууһун гимназиятын химияҕа учуутала, билигин бочуоттаах сынньалаҥҥа олорор.

10.  Иван Петрович Алексеев, Дьокуускайдааҕы  Национальнай гимназия черченияҕа учуутала.

       Эҕэрдэ истиҥ тылларга холбоһон, бэйэлэрин олохторугар бу дьон сүҥкэн оруолу оонньообуттарын бигэргэтэр тыллары Прокопий Семенович Иванов, Саха Өрөспүүбүлукэтин норуотун хаһаайыстыбатын үтүөлээх үлэһитэ, Татьяна Павловна Митина, бухгалтер идэлээх, Владимир Шиндикиевич Ю, Айыы кыһатыгар Аҕалар сүбэлэрин  бэрэссэдээтэлэ, Саргылана Ильиничн Иннокентьева, быраас идэлээх,  куораттаагы лицей дириэктэри иитэр үлэҕэ солбуйааччы Ирина Павловна Павлова,  Ньиэп уонна Гаас Институт дириэктэрэ  Марина Дмитриевна Соколова эттилэр, үгүс элбэҕи ахтан-санаан аастылар. Үөрэнээччилэр ааттарыттан  Трофим   Иванов,  Саха академическай театр артыыһа Роман Дорофеев,  ХИФУ выпускнига Александр Павлов уо.д.а. долгутуулаах ахтыылары онордулар.

Хас биирдии учуутал тус туһунан суоллаах- иистээх, ол эрээри оҕону да, төрөппүту да үрдүккэ-кэрэҕэ тардыһыннарар сүдү талааннаах, дьиҥ чахчы Учуутал үрдүк аатын толору ылбыт киһи буолар. Убаастыыр учууталларбыт сыралаах үлэлэригэр өссө үрдүк ситиһиилэри, махталлаах үөрэнээччилэри, өйдүүр-өйүүр төрөппүттэри баҕара хаалабыт.

                                         Д.Санникова, Институт общественноһы кытта сибээһин отдела

 

 

 

Запись опубликована в рубрике Новости. Добавьте в закладки постоянную ссылку.

Добавить комментарий