«К Ы Н А Т» төрөппүттэр республикатааҕы хамсааһын-түмсүү тэрээһин мунньаҕа

Алтынньы ый 7 күнүгэр С.Н.Донской-II аатынан үөрэҕи сайыннарар уонна идэни үрдэтэр институт аактабай саалатыгар «К Ы Н А Т» төрөппүттэр республикатааҕы хамсааһын-түмсүү тэрээһин мунньаҕа буолан ааста. Хамсааһын-түмсүү сыалын, соруктарын уонна үлэлиир хайысхатын тэрийээччи, институт иитии уонна эбии үөрэхтээһин кафедратын доцена Адамов Г.И. информация онордо.

«КЫНАТ» хамсааһын-түмсүү биир санаалаахтар түмсүүлэрэ, сахалыы тыллаах төрөппүттэри кытта үлэни тэрийэр уонна кэнники сылларга кэҥиир, атын омуктары кытта хабар баҕалаах. «Биһиги үлэбит саҕалааһына сахалыы саҥалаах дьиэ кэргэттэри кытта үлэҕэ туһаайыллар. Иитии үлэтин тула баар бары общественнай хамсааһыннары ханнык да хайысхаҕа солбуйа соруммакка, кинилэргэ көмөлөһөр, өй-санаа салҕаһар, үлэ ситимнээх буоларыгар хамнатар тэрийээччинэн, көҕүлээччинэн буолар былааннаах. Иитии үлэтин төрүт кыһалҕаларын быһааран, онон айылҕа суруллубатах сокуоннарыгар уонна өбүгэ дьоммут үгэстэригэр тирэҕирэр үлэни ыытыаҕа»,-диэн Гаврил Иннокентьевич тоһоҕолоон бэлиэтээтэ.

Хамсааһын-түмсүү тэрийэр үлэтин куорат тустаах түөлбэлэринэн, итиэннэ «НЭҺИЛИЭК» бырайыак чэрчитинэн төрөппүттэр оҕолорун кытта биир өйгө-санааҕа кэлиилэрин, сүбэлэһэр-амалаһар буолууларын ситиһэргэ тирэх буолара саарбаҕа суох. Нэһилиэктэргэ оҥорон таһаарар үлэҕэ, хааччыйыы эйгэтигэр, дьиэ кэргэнинэн үлэҕэ кыттыыны көҕүлүүр, тэрээһин үлэлэригэр көмөлөһөр, үп-харчы булуутун тобулууга бииргэ үлэлэһэргэ турунар санаалаах.

 Мунньахха«КЫНАТ» төрөппүттэр республиканскай хамсааһын-түмсүүтугэр тэрийэр-сүбэ бигэргэтилиннэ:

                   -  Адамов Гавриил Иннокентьевич

                   -  Михайлов Виктор Данилович

                   -  Иванов Кэскил Ньургунович

                   -  Александрова Вероника Валерьевна

                   -  Никитина Вилюяна Николаевна

                   -  Бурнашева Светлана Афанасьевна

                   -  Васильева Галина Михайловна

Тэрээһин мунньах кыттааччылара нэһилиэктэргэ, түөлбэлэргэ аарыма кырдьаҕастар сүбэлэрин тэрийии, кинилэр олохтон ылбыт муударастарын туһаныы, «МИН» диэн өйдөбүлү өрө тутуу наадалааҕын бэлиэтээтилэр. Түмсүү саха киһитэ, ыала ис туруга чөл уонна бөҕө туруктаах буоларын туһугар үлэни тэрийиэҕэ.

 Мунньах кыттыылаахтарын тыл этиилэриттэн быһа тардан билиһиннэрэбит:

Герасимов Александр Августович: Биһиги дьиэ кэргэн айылҕаны кэтээн көрүү дневнигинэн дьарыктаммыппыт ыраатта. Дьон сэҥээрэр. Бу дневник нөҥүө оҕону айылҕаҕа чугаһатар, араас дьайыыларын оҕо кэтээн көрөр усулуобуйатын тэрийэр кыахтар бааллар. Онон маны тарҕатыаҕыҥ, кэҥэтиэҕиҥ. Киһи барахсан айылҕа оҕото буоларын билиниэххэ, төрөппүт оҕотун кытта кыттыһан айылҕатын кытта доҕордуу буоларын ситиһиэххэ. Биһиги саҥа тэриллэр хамсааһыны кытта бииргэ үлэлииргэ бэлэммит.

Михайлов Савва Анатольевич – КЫНАТ түмсүү идеятын өйүүбүн, көмөлөһөргө бэлэммин. Гавр.Иннокентьевич «НЭҺИЛИЭК» диэн проега ситиһиилээхтик үлэлиирин итэҕэйэн, кини бу тэрийэр түмсүүтэ эмиэ туох эрэ хамсааһыны таһаарыаҕар итэҕэйиэҕи баҕарыллар. Оҕону сахалыы иитэр уһуйааннар, оскуолалар бааллар, кинилэри кытта бииргэ үлэлиир суолу тобулуохха. Атын түмсүүлэри кытта бииргэ үлэлиир суоллары толкуйдуохха.

Республикаҕа быһа холоон 200000 дьиэ кэргэн, ол иһиттэн 24.000 элбэх оҕолоох дьиэ кэргэн бааллар.

 Герасимова Маргарита Афанасьевна: Мин тыа сирдэринэн элбэхтик сылдьабын, дьон бөҕөнү көрсөбүн. Онно көрдөххө, биллэххэ дьон-сэргэ билиэн-көрүөн, туохха эмэ кыттыһыан баҕата олус улахан. Онно көмөлөһөр олох наада. Онон бу хамсааһын итини табатык өйдөөн, ылынан, үлэтин хайысхатын ити сорукка этиллибитин курдук туттаҕына улахан көдьүүстээх буолуо этэ. Мин бэйэм «Киһи сайдыылаах буоларыгар туох нааданый?», «Ситиһиилээх буолуу төрдө» диэн хайысхаларга үлэлэһэбин. Бииргэ үлэлииргэ бэлэммит биһиги ыал.

Лебедева Алена Ивановна: Биһиги түмсүүбүт некоммерческай түмсүү буолуоҕун туһунан толкуйдуохха, харчыны-үбү буларга, ону туһанарга наада этэ дии саныыбын. Герасимовтар лекцияларын мин кэргэним истэн, сөбүлээн аҕай кэлэн, оҕотунаан айылҕаны кэтээһини саҕалаабыта. Онтон бэйэтэ тэйэн оҕотугар хаалларбытыгар уостан хаалла оҕо. Онон төрөппүт хайаан да бииргэ үлэлиирэ наада эбит дии санаатым.

 Васильева Галина Михайловна: Мин Хомус Уйбаан лекциятын сөбүлээтим. Аныгы оҕолор саҥарар аппараттара мөлтөөтө, а.э. артикуляциялара барыта нууччалыыга оҕунна. Онон сахалыы саҥаны сайыннарар буоллахха бу кыһалҕаны быһаарыыга көмө быһыытынан методическай пособиены бэлэмниир наада буолла.

 Баина Мария Петровна: Галина Михайловна этэр пособиета тахсара олус наада. Онно үлэлэһиэххэ. Үөрэх күнүн 5 күн оҥоруохха наада, оҕо икки күн төрөппүтүн кытта сылдьара, ити күннэргэ төрөппүтүн кытта тугунан барытынан дьарыктаныан наада. Элбэх оҕолоох ыалларга сырдатар-быһаарар, өйдөтөр-сүбэлиир үлэ барара буоллар. Уопсайынан информация тиийбэт, онон билии-көрүү кэҥээбэт.

 Егорова Екатерина Степановна: Төрөппүт оҕотун кытта алтыһыыта олус аҕыйаата. Круглай группаларга сылдьар оҕолор общество оҕолоро буоллулар диэн хорсуннук этиэххэ сөп. Төрөппүтү оҕоҕо хайдах сыһыарар туһунан толкуйга үлэлиэххэ, туох эрэ саҥа этиилэри тобулуохха. Быйылгы дьылга сахалыы өйү-санааны, тыыны салҕыы тилиннэрии кэҥииригэр үлэни-хамнаһы туһаайыахтаахпыт. Онон саха өркөн өйдөөхтөрүн, муударай кырдьаҕастарын, наука инники күөнүгэр сылдьар учуонайдарын түмэ тардан, миэстэҕэ тахсан, дьону-сэргэни, дьиэ кэргэттэрин кытта көрсүһүүлэри тэрийиини, кэпсэтиилэри олохтооһун наада.

          Түмүктээн эттэххэ, «КЫНАТ» түмсүү саха тыла омук тыыннаах хаалыытын мэктиэтинэн буоларын итэҕэтиигэ, сахалыы тыыны, өйү-санааны дириҥэтиигэ үлэтин аныыр былааннаах. Саха омук историятыгар саҥа чинчийиилэр түмүктэрин норуокка билиһиннэрэр сыалтан миэстэлэринэн сайаапкалары сэтинньи ый иһинэн хомуйан, биригээдэлэринэн тахсан лекциялары ааҕыыны, мөккүөр-кэпсэтиилэри тэрийиини сыл устата былааннаахтык ыытар санаалаах.

 

                                                                Уопсастыбаны кытта сибээс отдела

 

 

 

 

 

 

 

Запись опубликована в рубрике Новости. Добавьте в закладки постоянную ссылку.

Добавить комментарий