Дидактическай пособиялар көрүүлэрэ

Быйыл үһүс сылын ыытыллыбыт «Смотр – фестиваль дидактических пособий» олус үчүгэйдик, сэргэхтик ааста, элбэх эдэр коллегалар кыттыбыттара кэрэхсэбиллээх. Барыта практическай үлэлэри көрөр буолан, маннык тэрээһиннэр хас биирдии үөрэх тэрилтэлэрин үлэһиттэригэр олус туһалааҕын уонна наадалааҕын санатабын.

Тохсунньу 25-26 чыыһылаларыгар республикабыт араас муннуктарыттан музыка кэрэ эйгэтин кырачаан уонна оскуола саастаах оҕолору үөрэтэр, иитэр педагогтар ИРОиПК тэрилтэтигэр, Дуткина Елизавета Петровна салайааччылаах, мустаммыт үлэ күөстүү оргуйда. Бастакы күн дидактическай пособиелары көрдүбүт-иһиттибит. Дьон айар дьоҕурун киһи сөҕөр, ордук сонун үлэлэри көрөн бэйэбит үлэбитигэр туһанарбытыгар идея, садҥа сүүрээн киирэр.  Оҕо саадын кыра бөлөх оҕолоруттан саҕалаан оонньуу нөҥүө музыканан иитии араас көрүҥнэрин көрдүбүт. Оскуола улахан кылаас оҕолоругар ырыа үөрэтиитигэр, хорга куоласка араарыыга, куолас эрчиллиилэрэ, интерактивнай оонньуулары, үҥкүү туруорууга көмө материаллары көрдүбүт- иһиттибит.

Түмүккэ үс призовой миэстэ уонна сэттэ номинация таҕыста:

Коллегабыт Туяра Николаевна Афанасьева, «Чуораанчык» оҕо саадын Ымыяхтах сэл., Нам улууһа, коллективын кытта кэлэннэр ВеДеДо (веселый день дошкольника) проектарын кэпсээннэр,  көрдөрөннөр (иитээччи + музыкальный руководитель бары бииргэ куолаан үлэлэрэ) – I миэстэни ыллылар. Манна сарсыардаттан саҕалаан оҕо киириэҕиттэн, сөптөөх эйгэ тэриллэн, режимыгар,сөп түбэһэн ырыанан иитиллэр.

Иитээччилэрэ музыкальнай инструмеҥҥа оонньуу үөрэммиттэрэ кэрэхсэбиллээх. Иитээччилэр бары уобаласка музыканы интеграциялаан оонньуулары, көмө материаллары оҥостубуттар.

Иккис миэстэни Таатта улууһуттан, Ытык-Күөл сэл., «Туйаара» оҕо саадын музыкальнай салайааччыта Евгения Егоровна Лиханова олус үчүгэй ис хоһоонноох, многофункциональнай музыкальнай лэпбук оҥорон ылла.

III миэстэни – Любовь Николаевна Петухова, Нам нэһилиэгиттэн, 5 №-дээх «Кэскил» оҕо саадын музыкальнай салайааччыта, 60-ча куукуланы аҕалбыт, барыта крючогунан баайыы. Куукулалара музыкальнай инструменнардаахтар.

Номинациялары бары убаастыыр коллегаларбыт Мэҥэ- Хаҥаластан   Капиталина Константиновна Семенова, куораттан Светлана Афанасьевна Константинова, Бүлүүттэн Ольга Афанасьевна Алампадистова, эдэр коллегаларбыт куораттан Тина Павлова, Елизавета Лукинова, Чурапчыттан Дария Слепцова, Варвара Николаевна Максимова «За современную педагогическую технологию»  номинацияны ыллылар.

Радиоҕа интервью биэрдибит, быйыл буолар международнай конгресс программатыгар ДОУ музыкальнай салайааччыларыгар туспа тэрээһин программаҕа киллэрэллэрин туһунан баҕа санаабын эттим. Елизавета Петровна рекомендациятынан аны саас мультимедийнай технологияларга республикаҕа семинар-практикум ыытарга диэн былаан киирдэ.

Иккис күн мастер-кылаастар, үлэ опытын тарҕатыы буолла. Манна дьэ дьиҥ – чахчы практическай үлэлэри көрөммүт, бэйэбит эппитинэн – хааммытынан кыттыыны ылан, билии бөҕө эбинэн, сорохторго бэйэбититтэн бэрсэн олус продуктивнай күн ааста. Баяҥҥа, домбраҕа да оонньуу үөрэннибит. Хомус алыптаах тыаһыттан күүспүтүгэр күүс эбиннибит, байаанынан ырыа да ылланна, үҥкүүлээн тэйдибит, быйылгы смотрга хореографтар кыттыыны ылбыттара кэрэхсибиллээх.

Түмүккэ республика бастыҥ үлэлээх, опыттаах музыка салайааччылара ааттаннылар. Куруутун үлэлэрин опытын бүтүн республика үрдүнэн тарҕатар, үөрэтэр коллегаларга кубок туттарыыта буолла, ол курдук: кэнники сылларга айан таһаарбыт ырыалара бүтүн республика музыкальнай салайааччыларын, детсад саастаах оҕолор куттарын туппут, Мэҥэ – Хаҥалас улууһун МО салайааччыта, 30 тахса сыл оҕо иитиитигэр эҥкилэ суох олоҕун анаабыт Семенова Капиталина Константиновна, оҕо ырыаларын биллиилээх автора, 40 ча сыл оҕо иитиитинэн үлэлии – хамсыы, айа – тута сылдьар Константинова Светлана Афанасьевна (Дьокуускай) оҕо ырыаларын автора, республикаҕа биир бастыҥ үлэлээх музыкальнай салайааччы, 30-ча сыл оҕо иитиитигэр үлэлии, айа тута сылдьар Петухова Любовь Николаевна (Нам), эдэрдэргэ үтүө холобур буолар бастыҥ үлэлээх, оҕо иитиитигэр 20- тэн тахса сыл үлэлээбит Алампадистова Ольга Афанасьевна (Бүлүү) бастыҥ музыкальнай салайааччыта, Нам улууһун МО салайааччыта, оҕо иитиитигэр 20-тэн  тахса сыл эҥкилэ суох үлэлээбит Афанасьева Туйаара Николаевна (Нам), уонна Максимова Варвара Николаевнаҕа (Таатта).

Олус үчүгэй тэрээһиннээх, чисто практическай үлэ икки күн устата бу курдук күөстүү оргуйда. Хомойуох иһин биһиги улуустан смотрга 2 эрэ музыкальнай салайааччы Лиханова Е.Е. уонна мин кытынныбыт, учууталлар суохтар.

Мастер кылааска эмиэ икки эрэ детсад музыкальнай салайааччыта Ытык-Күөл «Березка» оҕону сайыннарар киин музруга Давыдова Оксана Егоровна уонна мин кыттыыны ыллыбыт, учууталлар суохтар. Эдэр коллегалар баран көрөллөрө, маннык таһымнаах тэрээһиннэргэ актыыбынай кыттыыны ылаллара бастатан туран бэйэлэригэр туһа аҕаларын өйдүөхтэрин наада уонна салалта өттүттэн өйөөн, үлэһиттэрин араас хабааннаах тэрээһиннэргэ ыытара олус наада дии саныыбын.Түгэнинэн туһанан Елизавета Петровнаҕа олус үчүгэй тэрээһиннээх смотр – фестиваль тэрийбитигэр барҕа махталбытын тиэрдэбит. Өссө үрдүк ситиһиилэри баҕарабын.

Максимова Варвара Николаевна,

МБДОУ «Кэскил» Туора Күөл Таатта улууһа

Запись опубликована в рубрике Новости. Добавьте в закладки постоянную ссылку.

Добавить комментарий