Онлайн-викторина түмүгэ

С.Н.Донской-II аатынан Үөрэҕи сайыннарар уонна идэни үрдэтэр институт саха уонна нуучча  тылларын кафедрата  улуу суруйааччыбыт саха советскай литературатын төрүттээччи  П.А.Ойуунускай 125,  саха народнай суруйааччылара Н.Г.Золотарев-Н.Якутскай 110, В.С.Яковлев-Далан 90 сылларыгар уонна Н.А.Лугинов  70 сааһыгар аналлаах  онлайн-викторина  тэрийэн ыыппыта.

Викторина сүрүн сыала-соруга төрөөбүт литературабытыгар тапталы иҥэрии; уус-уран тыл маастардарыгар, улуу суруйааччыларбыт сүдү талааннарыгар сүгүрүйүү; П.А. Ойуунускай,  Н.Г.Золотарев-Н.Якутскай, В.С.Яковлев-Далан, Н.А.Лугинов олохторун, айар үлэлэрин дириҥэтэн билэргэ, үөрэтэргэ, айымньыларын ааҕарга ыҥырыы, угуйуу; информационнай технологияны туһанан билиини тургутуу.

Ый устата кыттааччылар түөрт түһүмэҕинэн үбүлүөйдээх суруйааччыларбытыгар, уран тыл  маастардарыгар П.А.Ойуунускайга, В.С.Яковлев-Далаҥҥа, Н.Якутскайга уонна Н.А.Лугиновка сыһыаннаах араас хабааннаах ыйытыыларга хоруйдаатылар. Викторинаҕа Амма, Булун, Орто Халыма, Уус-Алдан, Муома, Ленскэй,  Сунтаар, Үөһээ Бүлүү, Ньурба, Бүлүү, Горнай, Мэҥэ-Хаҥалас, Эдьигээн, Чурапчы, Верхоянскай, Нам, Кэбээйи, Хаҥалас, Таатта улуустарыттан  барыта 150 үөрэнээччи, учуутал кытынна.

Кыттааччылар суруйааччы тус олоҕор, айымньы  геройдарын тылыгар-өһүгэр, мэтириэтигэр сыһыаннаах уонна талар эппиэттээх ыйытыктарга ордук  бэркэ эппиэттээбиттэр. Народнай суруйааччы Н.А.Лугинов, олоҥхо педагогикатын чинчийээччи-тарҕатааччы, п.н.к Е.П.Чехордуна аудио-видео ыйытыктарыгар сүрдээҕин кыһаллан, толору эппиэттээбиттэр.  Хаһыат ыстатыйаларыгар, тус олохторун кэрчигэр сыһыаннаах биирдиилээн бытархай ыйытыктарга ыарырҕаппыттара көһүннэ.

Бу викторинаҕа оскуола үөрэнээччилэрин, саха тылын уонна литературатын, төрүт култууратын учууталларын таһынан, атын предмет учууталлара(физкультура, география, химия, нуучча тыла, физика, математика)кыттыбыттара кэрэхсэбиллээх.

Төрөөбүт литератураҕытын таптааҥ, уус-уран литератураны ааҕыҥ, билиигитин мэлдьи хаҥата, байыта сылдьыҥ.  Онлайн-викторинаҕа кыттыбыккытын туоһулуур сертификаттары, дипломнары анкетаҕытыгар ыйбыт  электроннай почтаҕытыгар ыытыллыаҕа. Биирдиилээн суруйааччыларга бастыҥ көрдөрүүлээх үөрэнээччилэргэ туспа диплом бэриллэр, электроннай почтаҕытыгар ыытыллар протоколтан көрөн билсэҕит. Викторинаҕа көхтөөхтүк кыттыбыт үөрэнээччилэри, учууталлары  истиҥник эҕэрдэлиибин.  Үөрэххитигэр, үлэҕитигэр ситиһиини!

Нуучча тылын уонна саха тылын кафедрата

ИТОГИ онлайн-викторины 2018

Запись опубликована в рубрике Новости. Добавьте в закладки постоянную ссылку.

Добавить комментарий